Најголемиот нафтен гигант ги запре испораките преку Црвеното Море! Што ќе се случи со нафтата?
Британскиот нафтен гигант Бритиш Петролеум (БП) денеска објави дека привремено ќе го прекине транспортот низ Црвеното Море поради безбедносни грижи, откако јеменските бунтовници Хути почнаа да гаѓаат бродови во регионот.
Бритиш петролеум додаде дека постојано ќе ја следи безбедносната ситуација во регионот и ќе реагира според околностите, јавува Би-Би-Си.
Некои товарни компании, исто така, го суспендираа транзитот на Црвеното Море поради нападот на Хутите, вклучително и една од најголемите светски бродски компании, Евергрин Лајн.
Црвеното Море е една од најважните светски патишта за испорака на нафта и гориво, како и за транзит на стоки за широка потрошувачка.
Бунтовниците Хути поддржани од Иран ги гаѓаат бродовите што патуваат низ теснецот Баб ел-Мандаб, познат и како Порта на солзите, канал широк 32 километри, кој инаку е опасен за навигација.
Бунтовниците Хути ги поддржуваат палестинските милитанти од движењето Хамас и гаѓаат бродови во странска сопственост со беспилотни летала и проектили.
Не е јасно дали сите нападнати бродови навистина пловеле кон Израел.
Фото: Принтскрин/Твитер
