На денешен ден во 1945 година во Битола е одржан првиот наставен час на современ македонски јазик
На 6 февруари 1945 година, во Битолската гимназија се одржа историски настан – првиот наставен час на современ македонски јазик во едно македонско средно училиште.
Одлуката за одржување на часот била донесена на првиот наставнички совет, со кој претседавал директорот Орде Печијаре. Веднаш тој ден, скромно украсената сала на гимназијата беше полна со ученици и гости. Молк го прекрши директорот Печијаре, кој соопшти дека гимназијата започнува со редовна настава на македонски јазик. Следеше силен аплауз, а претставниците на народната власт ги поздравија присутните и зборуваа за значењето и улогата на гимназијата во ослободената татковина.
Членовите на штотуку формираниот градски театар и културно-уметничката група при гарнизонот изведоа пригодна програма. Присутните ја слушнаа по прв пат поетската убавина на Константин Миладинов со „Т’га за југ“, „Бисера“, „Голапче“, како и стиховите на Кочо Рацин, придружени со македонски народни песни, кои ја разбудија душата на сите во салата.
Првата учебна година ја следеле 572 ученици во 13 мешани паралелки, завршувајќи на 20 јуни 1945 година. Гимназијата со текот на времето ги менувала имињата – од 1945 до 1952 носела името на Гоце Делчев, за време на Нижата гимназија (1951-1952) била наречена Никола Карев, а од 1952 година па сè до денес го носи името Јосип Броз-Тито. Независно од имињата, во Битола останала позната како Горната гимназија.
Денес, во холот на гимназијата, на мермерна плоча се изложени имињата и ликовите на пет народни херои – средношколци кои учеле во гимназијата: Стеван Наумов-Стив, Мирче Ацев, Страшо Пинџур, Кузман Јосифовски-Питу и Елпида Караманди.
Наставниците и учениците од секоја генерација со гордост истакнуваат дека дел од нивните колеги станале истакнати личности, меѓу кои академици и писатели, како Петре М. Андреевски, Томе Бошевски, Кирил Миљовски, Фанула Папазоглу, Коле Чашуле, Владо Камбовски, Љубен Лапе, Ѓорги Филиповски, Анте Поповски, Ѓорѓи Чупона, Михаил Петрушевски, Петар Серафимов, Ристо Лозановски, Живко Попов, Димче Коцо, Александар Христов, Георги Константиновски и писателот Владимир Костов, почесен член на МАНУ.
