МЗ: Надлежните институции реагирале по немилиот инцидент во Клиничката болница Тетово
Министерството за здравство соопшти дека по пријава од Клиничката болница во Тетово за напад врз медицински персонал, надлежните институции веднаш презеле соодветни мерки. Според пријавата, 28-годишен маж покажал агресивно однесување и физички нападнал еден од лекарите во болницата.
„Министерството за здравство остро ги осудува сите облици на насилство врз здравствените работници и се залага за почитување на нивниот интегритет, достоинство и професионалност. Лекарите се сојузници на пациентите и нивните семејства, а само преку заемна доверба и почит може да се обезбеди хуман и безбеден здравствен систем“, се наведува во соопштението.
Од СВР Тетово информираа дека инцидентот се случил вчера околу 16 часот, кога полициски службеници го лишиле од слобода М.М. (28) од селото Челопек, откако тој агресивно се однесувал кон персоналот и физички го нападнал Л.А. (31) од село Желино, лекар во Клиничката болница, кој се обидувал да му пружи медицинска помош.
Дополнително, при интервенцијата, осомничениот покажал агресија и кон полицијата и физички нападнал еден од полициските службеници.
М.М. е приведен и задржан во полициска станица, а по целосно документирање на случајот против него ќе биде поднесена соодветна пријава.
