Можно зголемување на цената на парното поради одлуката на Уставниот суд
Цената на топлинската енергија може да се зголеми по последната одлука на Уставниот суд, предупреди денеска претседателот на Регулаторната комисија за енергетика (РКЕ), Марко Бислимоски.
Одлуката, која се однесува на либерализирање на постапката за исклучување потрошувачи од парното греење, според него може да доведе до намалување на бројот на приклучени домаќинства. Тоа пак ќе има директно влијание врз зголемување на цената за останатите потрошувачи.
„Ќе ја почитуваме одлуката на Уставниот суд, но таа ќе значи полесно исклучување од системот, што ќе доведе до зголемени трошоци поради помал број корисници“, рече Бислимоски.
Притисок врз електричната мрежа
Бислимоски посочи и дека зголемениот број потрошувачи што би се префрлиле на електрично греење може сериозно да го оптовари дистрибутивниот систем во Скопје.
„Посебно се плашам дека дистрибутивната мрежа нема да издржи. Таа е проектирана за регион со парно, а не за зголемено користење на струја за греење“, додаде тој.
Причини за прекините со струја и мерки за стабилизација
Во однос на масовниот прекин со електрична енергија минатиот викенд, Бислимоски изјави дека од МЕПСО се очекува комплетен извештај. Проблемите настанале во период кога фотоволтаичните електрани не произведувале струја.
„МЕПСО веќе презема мерки, а во план е и тендер за поставување голема кондензаторска батерија во Неготино“, изјави тој.
Новиот закон овозможува батериски системи
Со новиот Закон за енергетика, овозможено е поставување батериски системи, посебно кај фотоволтаичните електрани. Според Бислимоски, тоа ќе помогне за балансирање на мрежата, а дел од капацитетите може да бидат ставени на располагање на МЕПСО.
Рок за промена на лиценците – до 30 јуни
Регулаторната комисија потсети и дека сите носители на енергетски лиценци, вклучително и за пробна работа, имаат рок од 29 мај до 30 јуни да поднесат барање за промена на лиценцата во согласност со новиот Закон.
Во моментот, активни се околу 8.800 лиценци за енергетски дејности и 150 за пробна работа.
„Доколку не поднесат барање, нивните лиценци ќе престанат да важат“, предупреди Бислимоски.
