Митко Јанчев огорчен од стечајот на Фени: Менаџери повлекувале плати од 9.000 евра додека немало производство
Градоначалникот на Кавадарци, Митко Јанчев, е огорчен од начинот на кој Еуроникел, односно поранешно Фени, го минува процесот на стечај пред да замине во рацете на новите газди – групацијата Јилдирим.
Новиот сопственик на некогашниот гигант за производство на фероникел утре ќе се сретна со премиерот Христијан Мицкоски, а Јанчев, во рамките на 49. седница на Совет на општината, рече дека се очекува на средбата да се разговара за почеток на работата на печката за топење никел во комбинатот.
Јанчев најави и исплата на заостанатите плати за вработените во рамките на стечајот, што беше отворен пред продажбата на Фени. На средбата се очекува да се разговара и за можноста за обештетување на транспортерите на руда, кои побаруваат пари за транспортот од пред стечајната постапка. Градоначалникот на Кавадарци информираше и дека новиот инвеститор досега вложил околу 45 милиони евра во комбинатот за фероникел.
Градоначалникот се прашуваше зошто немало финансиска контрола, а имало сомнеж за скриена добивка. Тој јавно ги повика институциите да го испитаат случајот, да се направи контрола како дошло до стечајот и да се види кој го земал „кајмакот“.
„Замислете, до самиот стечај на Фени, до денот на отворање на стечај, сам на себе да си поминуваш плата по девет илјади евра. Притоа, немајќи производство девет месеци“, рече Јанчев, мислејќи на менаџерите на комбинатот кои имале склучено менаџерски договори.
Јанчев се осврна и на тоа какви договори своевремено потпишале транспортерите за транспорт на руда и ја појасни неповолноста во тие договори, додавајќи дека некој профитирал од тоа. Пред стечајот, во поранешниот гигант Фени беа вработени околу 800 луѓе.
