Мицкоски: ВМРО-ДПМНЕ покажа скандинавско управување со општините
„Во изминатите година дена покажавме дека и во Македонија е возможно европско, скандинавско управување – прво на локално, а сега и на централно ниво, без афери поврзани со криминал, корупција или злоупотреби“, изјави денеска премиерот Христијан Мицкоски, одговарајќи на новинарски прашања при посетата на Општина Штип.
Мицкоски додаде дека е уверен во „историски голема победа на локалните избори на ВМРО-ДПМНЕ.
„Поминува четвртата година од претходните локални избори, најголемиот дел од градоначалниците – 42 се од редовите на ВМРО-ДПМНЕ или Коалицијата и нема ниту едно основано сомневање за сторен криминал, корупција или сторена злоупотреба. Покажавме и докажавме дека можеме многу подобро да ги управуваме институциите и Општините од многу европски земји и голем број од нив се дел од Европската Унија“, рече Мицкоски.
На прашањето колку од актуелните градоначалници на ВМРО-ДПМНЕ може да очекуваат втор мандат, премиерот рече дека не би зборувал за имиња, но дека во втората половина на мај би излегле со 80-90 проценти од имињата.
„Треба да ги погледнеме мерењата на јавното мислење. Многу скоро од денеска, втора половина, крај на мај ќе излеземе со би рекол со 80, 85, можеби 90 проценти од имињата. Се разбира јас пред Извршниот комитет и пред Централниот, се разбира потоа е одлука на Извршниот и Централниот комитет дали ќе ги прифати, нема, ќе има дебата“, рече Мицкоски.
