Мицкоски на ЕСС: Дијалог и одговорност – економски раст и реални политики!
Премиерот Христијан Мицкоски денеска, на состанокот на Економско-социјалниот совет, истакна дека Владата има јасна слика за реалната состојба во која живеат граѓаните и додаде дека е свесен за предизвиците со кои се соочуваат.
„Знаеме дека стандардот не се подобрува преку ноќ, но ако навистина сите веруваме дека интересот на граѓаните е поважен од политичките разлики, тогаш можеме да донесеме добри решенија“, порача Мицкоски.
Тој призна дека постојат разлики меѓу Владата и дел од синдикатите, но нагласи дека токму тие разлики се причина за поискрен дијалог. „Кога постои волја, постои и пат. А волјата денес постои – и кај нас и кај социјалните партнери“, рече премиерот.
Во изминатата година, според него, Владата работела тивко, но посветено и резултатите веќе се гледаат. Платите во мај се зголемиле за 11%, а растот на бруто-домашниот производ во првиот квартал достигнал 3,2%. Во исто време, индустриското производство пораснало за 9,4%, што според премиерот, е резултат на системски мерки и фискална дисциплина.
Мицкоски нагласи дека годинава се обезбедени 250 милиони евра за поддршка на нов инвестициски циклус кај компаниите, и уште 250 милиони евра за општините за капитални проекти. „Ова не се ветувања, туку пари кои веќе се инвестираат на терен“, рече тој.
Истакна и дека првпат по седум години е забележано намалување на јавниот долг – за 4,7 процентни поени во однос на БДП или 36 милиони евра во апсолутна вредност. Воедно, според него, Владата целосно ја отплатила еврообврзницата од 500 милиони евра од 2018 година, без издавање нова. „Тоа не е само финансиска ставка, тоа е доказ за одговорно владеење“, рече премиерот.
Во говорот, Мицкоски ја спомена и новата Фискална стратегија 2026–2030, со која се зацврстува основата за стабилен економски раст во следните пет години. Очекува денес да се усвои Програмата за работа на Економско-социјалниот совет за 2025 година, која треба да биде потврда за функционирањето на овој совет како вистински механизам за социјален дијалог.
„Оваа Влада покажува дека државата може да се води со стабилни финансии, растечки плати, поддршка на економијата и дијалог со сите општествени чинители. Ако сакаме подобро утре, тоа почнува со чесна работа денес“, заврши Мицкоски.
