Маж облекол мантија, се претставил како свештено лице на гробиштата во Ѓорче Петров и за пари нудел изведување на верски обреди – полицијата го уапси!
Викендов на гробиштата во Ѓорче Петров се случил несекојдневен настан. Според сведоштва на присутни граѓани, маж облечен во мантија се претставувал како свештено лице и за паричен надомест нудел изведување на верски обреди.
Еден од очевидците, кој случката ја објавил на социјалните мрежи, навел дека додека лицето се подготвувало да започне со обредот, на местото пристигнала полиција и го привела. Поради тоа, обредот не бил изведен.
Од Министерството за внатрешни работи информираа дека на 1 ноември 2025 година, на гробиштата во Ѓорче Петров, полициски службеници го легитимирале Б.П., кој извршувал верски активности. Од МВР соопштија дека се преземаат мерки за целосно расчистување и документирање на случајот.
