Масовни руски напади со дронови врз Украина – експлозии во Киев, погодени објекти
Руски сили ноќеска изведоа голем воздушен напад врз енергетската инфраструктура во централните и северните делови на Украина. Во нападите изведени со дронови и ракети беа погодени градот Кременчук, како и Черниговската и Киевската област, при што загина најмалку еден цивил, а повеќе лица се повредени, соопштија локални власти, јавува The Kyiv Independent.
Напад врз енергетиката во Кременчук
Експлозии во Кременчук, Полтавска област, одекнаа околу 1:30 часот наутро, а украинското воено воздухопловство предупреди за приближување на проектилите Кинжал и десетици дронови. Градоначалникот Виталиј Малечки потврди прекини во снабдувањето со електрична енергија, вода и греење во делови од градот и додаде дека екипи на терен работат на санирање на штетата.
Според гувернерот Владимир Кохут, погодени се повеќе енергетски објекти во округот Кременчук. Директните удари и остатоците од паднатите дронови предизвикаа пожари и оштетија техничка опрема, но нема пријавени жртви во овие напади.
Разурнувања во Черниговската област
Руски дронови го нападнаа и Чернигов, вклучувајќи критична инфраструктура и енергетски објекти, изјави гувернерот Вјачеслав Чаус. Во нападот со дронови „Геран“ во населеното место Новгород-Сиверски загина 50-годишен маж во својот дом, а еден полицаец беше повреден. Погодени се полициска станица, медицинска школа и неколку куќи.
Во самиот град Чернигов, цел на нападот беше термоелектрана, а остатоците од урнатите дронови беа пронајдени на градското подрачје, потврди Дмитро Брижински, началник на регионалната воена управа. Поради нападот, повеќе населени места останаа без струја, но снабдувањето беше повторно воспоставено до утринските часови.
Експлозии во близина на Киев
Експлозии беа забележани и во градот Фастив во Киевската област, но засега нема извештаи за штети. Фастив неодамна беше мета на руски напади на 5 декември, во рамки на масовниот удар врз украинската енергетска мрежа. Во тој напад беше погодена и главната железничка станица, што претседателот Володимир Зеленски го опиша како „воено бесмислен напад“.
Руски сили во последните месеци редовно изведуваат напади врз украински градови, додека САД и меѓународната заедница се обидуваат преку преговори да најдат решение за завршување на војната во Украина.
