Манев за Палчо: Ни ветуваше 150 илјади евра, но потоа рече нема да бидат толку пари ќе бидат помалку!
Денеска во Кривичниот суд продолжи судењето за двојното убиство на Вања и Панче. Обвинитиот Велибор Манев вели Љупчо Палевски – Палчо ги убил двете лица, и го објасни начинот на кој го сторил тоа.
На прашање на неговиот бранител колку пари им биле ветени од Палчо, Манев одговори:
„Првично по 150 илјади евра ни ветувше за грабнување на ќерката на фармацевтот. За после тоа откако видовме дека не е таа особа и дека е грешка, рече нема да бидат толку пари ќе бидат помалку, но важно ќе ги земеме“, рече Манев.
Манев рече дека во полиција во Скопје физички го тепале и дека му покажале фотографија од Алексндар, таткото на Вања, за кого кажал дека не го познава.
„Во Велес немав никаков распит, во Скопје за да почнам да зборувам побрав адвокат, и да кажам што како е. Тие не сакаа ништо тоа да слушнат, почнаа физички да ме тепаат, газат за дапочнам да им кажувам и да им зборувам. Еден од инспекторите, ми пријде ми покажа слика од машка особа ме праша дали го познавам. Јас му реков дека ниту го имам видено, ниту го имам контактирано човекот. Тој ми рече дека е таткото на детето. Дали сум го слушнал да разговара Палчо со таткото на детето. Јас му реков дека ниту сум слушнал ниту знам, Палчо со кој разговарал ниту можам да му бидам секретарка да знам со кој праи муабет. Тука почнаа уште појака тортура, кажи па кажи дека сум видел дека Палчо разговарал со таткото“, рече Манев.
