Лажна тревога во американскиот Сенат, службениците мораа да се заклучат
Полицијата денеска ја затвори зградата на американскиот Сенат, откако беше пријавено дека внатре е забележан вооружен маж, но по деталниот преглед е утврдено дека тоа не е вистина, пренесува CNN.
Кога пристигнала пријавата, дел од вработените побегнале од зградата, а на оние што останале полицијата им наредила да се заклучат во собите додека не заврши претресот.
Началникот на полицијата во Капитол, Том Мангер, им рече на новинарите дека „се работи за лажен повик“ и дека никој со оружје не бил пронајден, откако повеќе од 200 полицајци отишле од врата до врата за да се уверат дека се е во ред.
„Засега нема ништо, никој не слушнал пукање и нема жртви“, рече Мангер, додавајќи дека нема закани во ниту еден од трите делови на Сенатот.
Портпаролот на Полициската управа потврди дека „нема докази дека некој е повреден“ и дека во моментов „не можат да ги потврдат наводите од повикот“.
Претставниците на Сенатот биле известени непосредно пред 15 часот по локално време дека во зградата се наоѓа вооружен маж.
