Кошутиќ го остава најголемиот енергетски проект во земјата за да ги води македонски Железници АД

Поранешниот заменик-министер за транспорт и врски и последен директор на Скопски саем, Дејан Кошутиќ, по само една година и неколку месеци откако беше назначен да раководи со големата израелска инвестиција во Македонија на гигантот Big Shopping Centers,  од новата власт е поставен за генерален директор на Железници – Транспорт.

Big Shopping Centers, позната по тоа што купува недвижнини на Балканот и поседува трговски молови во регионот, преку својата фирма за инвестирање во производство на електрична енергија БИГ Енергиа Холдингс ја регистрираше македонската компанија Биг Мега Менаџмент, а во текот на минатогодишната пролет го ангажираше Кошутиќ.

Новиот менаџер ќе има голема одговорност пред себе со оглад на тоа што акционерското друштво во државна сопственост е едно од назадолжените и најнерентабилните претпријатија во земјата, но Кошутиќ за „Фактор“ вели дека во моментов се прават планови за нова визија во работењето, кои ќе бидат наскоро обелоденети пред јавноста.

Истовремено „Фактор“ го праша кој е мотивот од менаџирање на еден амбициозен инвеститорски проект да се префрли на раководење на друштво кое добива позајмици и субвенции за да подели плати и да ја плати сметката за струја.

– Официјално излегов од Биг Мега Менаџмент и повеќе таму немам никакво влијание. Целосно ќе се посветам на мојата нова функција. Можам да кажам дека од Биг Мега Менаџмент заминувам во вистинско време, бидејќи таму, како што се вели – детето е изведено на прав пат. Сите проекти се спакувани како што треба и се оди по планот. Мојата задача таму заврши, а во Железници – Транспорт само што започнува, вели Кошутиќ.

Big Shopping Centers летото 2022 соопшти дека презема проект во Македонија вреден 53 милиони евра на огромна површина во Пробиштип со изградба на фотоцентрала со моќност од огромни 119 мегавати, а веќе се и превземени уште неколку проекти за електрани со над 50 мегавати. 

БИГ Енергиа Холдингс, огранокот на Big Shopping Centers, во последно време инвестира, но и купува готови проекти за производство на електрична енергија од обновливи извори. Свои тековни инвестиции има во Романија и БИХ, а активна е и во други земји од регионот.

Фирмата-мајка тогаш рече дека компанијата купила проекти со вкупен капацитет од 500 мегавати и оти инвестициите во нив треба да изнесуваат вкупно 520 милиони евра. Вкупната моќност од портфолиото на проекти во подготовка достигна 1,4 гигавати. Компанијата има за цел да биде доминантна во областа на обновливите извори на енергија во Источна Европа и на Балканот.  BIG работи од 1994 година. Таа е водечка групација за недвижнини во Израел. Компанијата излезе на берзата во Тел Авив во 2006 година, а нејзината пазарна капитализација на 31 декември 2021 година беше 3,1 милијарди евра.  Според информациите кои неофицијално претходно ги добивме од „Биг Енергија Холдингс“, веќе се купени околу 900.000 метри квадратни земјиште во близина на Пробиштип, а десетици илјади метри квадратни од таа површина претходно била државно земјиште преземено заради дооформување на парцела само за проектот „Скај Солар“..

Кошутиќ од 2002 до 2006 беше заменик-министер за транспорт и врски, а директор на Скопски саем беше до самото постоење на претпријатието кое се расформира во 2020. Во меѓувреме беше и шеф за изнаоѓање странски пазари на АД Бетон.