Конзервативците и социјалдемократите формираа коалиција во Германија
Фридрих Мерц, претседател на Христијанско-демократската унија (ЦДУ) и веројатен иден германски канцелар, изјави при претставувањето на коалицискиот договор на идната демохристијанско-социјалдемократска влада во Берлин дека договорот претставува силен сигнал за Германија, но и за Европската унија.
„Германија добива ефикасна и силна влада, тоа е пораката до нашите европски партнери. Европа може да се потпре на Германија“, изјави Мерц по завршувањето на коалициските преговори меѓу демохристијанската Унија ЦДУ/ЦСУ и Социјалдемократската партија на Германија (СПД).
Мерц ги пофали брзите и складни преговори со СПД и заклучи дека тоа претставува важна основа за идната соработка.
„Заеднички дојдовме до овој договор и сметам дека тоа е добра основа за работата на владата во следниот изборен период“, изјави Мерц.
Тој изрази уверување дека новата влада ќе започне со работа „најдоцна на почетокот на мај“.
