Колкави затворски казни ги очекуваат српските напаѓачи од Бањска?
Oд десет години до доживотен затвор им се заканува на српските напаѓачи кои кај селото Бањска во северно Косово во неделата убија косовски полицаец. Косово истражува дали Русија е вмешана во нападот.
Ќе одговараат за тешки кривични дела против уставниот поредок и безбедноста на Република Косово, за подготовка терористички дејства или кривични дела против уставниот поредок и безбедноста на Република Косово и за неовластено поседување, контрола и држење оружје.
Властите во Приштина упатија обвинувања дека се работи за криминална група, која била „поддржана и финансирана од Србија“ барајќи казна и санкции од официјален Белград.
Косовскиот министер за внатрешни работи, Џељаљ Свечља, изјави дека Србите што се судрија со полицијата „планирале да го дестабилизираат северот и потоа да прогласат автономија во близина на реката Ибар“. Тој во интервју за „Евроњуз Албанија“ изјави дека групата ја предводел потпретседателот на Српската листа, Милан Радоичиќ, „по наредба на претседателот на Србија, Александар Вучиќ“.
Српскиот претседател, изјави дека убиството на полицаецот на Косово е апсолутно за осуда. Тој во своето обраќање по инцидентот рече дека се случило она за што долго време предупредувал, а тоа е дека Србите се побуниле „не сакајќи повеќе да го трпат теророт на Албин Курти“.
