КОЈ ПЛАТИ 82 ИЛЈАДИ ЕВРА ЗА 223 АКЦИИ – во блок трансакција се постигна цена од 22.500 денари по акција за „Алкалоид“

Иако на Берзата владее своевидно затишје и неколкудневна корекција благо надолу на најголемиот дел од акциите кои го сочинуваат Македонскиот берзански индекс МБИ 10, инвеститорите не престануваат да се интересираат за хартиите од вредност на најдобрите и најмоќните компании. И да купуваат од овие акции, бидејќи тоа е секогаш една од најдобрите инвестиции, и тоа и во поглед на остварување на дивиденди, и во поглед на поседување на квалитетна хартија од вредност како влог во иднината, но и во поглед на остварување на солидни капитални добивки доколку воопшто некогаш решат да ја продадат таа акција.

Една од акциите која постојано е во фокусот на инвеститорската јавност, секако дека е акцијата на нашиот фармацевстки гигант „Алкалоид“, која е меѓу најтргуваните, но и меѓу најрастечките акции на пазарот на капитал.

Тие акции, покрај на редовниот пазар, често се продаваат и преку бклок трансакции на Берзата, кога продажбата се врши за однапред познат купувач и по однапред договорена цена.

Инаку, вчера на Берзата преку блок трансакција биле продадени 223 акции на „Алкалоид“, по цена од 22.500 денари за акција. Или, вкупната вредност на трансакцијата е близу 82 илјади евра.

Она што треба да се спомене е дека инвеститорот што ги купил овие акции платил повисока цена од онаа по која редовно се тргувало на пазарот, а тоа е просечна цена од 22.014, колку што била остварена за акциите на „Алкалоид“ на редовниот пазар.

Кој е купувачот на акциите засега не е познато, но факт е дека компанијата секогаш известува за сите промени во сопственоста преку ценовно чувствителни информации.

Алкалоид е една од најпрофатабилните и најиновативните компании во земјава, а нејзините акции се секогаш меѓу најтргуваните на Берзата.

Н.Н.Ф.