Кој чува милијарда евра во македонски државни обврзници?
Тоа што трите најголеми банки чуваат повеќе од 1 милијарда евра во обврзници значи само едно: дека позајмувањето на државата е сигурно и доходовно за банките. Токму заради тоа и во овој период кога имавме парламентарни избори и промена на власта банките продолжија да купуваат државни обвзници и нивните вложувања во овој инструмент го зголемија за 153 милиони евра во период од девет месеци
Голема е и силна поддршката што на македонската држава и ја пружаат трите најголеми деловни банки во земјава. Најновите официјални неревидирани податоци од финансиските извештаи на „Комерцијална банка“, НЛБ Банка и „Стопанска банка“ Скопје покажуваат дека трите банки во државни обврзници чуваат повеќе од една милијарда евра.
Официјалните податоци од билансите на состојба на овие три големи банки покажуваат дека нивните вложувања во обврзници за девет месеци се зголемени за 153 милиони евра во однос на состојбата на вложувања на крајот на 2023 година.
Од трите банки најголеми се вложувањата во државни обврзници на „Комерцијална банка“. На крајот на септември тие изнесуваат 554,76 милиони евра. За девет месеци бележат зголемување за 69,2 милиони евра. Тоа е значаен раст на вложувањата во обврзници затоа што надминува 14 отсто во период од само девет месеци. Токму овој показател е индикатор дека најголемите банки веруваат во државата односно конкретно во Владата која е креатор на сите макроекономски политики. Вложувањата означуваат дека банките имаат верба во државата и во сигурноста на пласманите исто како што веруваат дека државата ќе си ја плаќа редовно и навремено каматата на позајмиците во форма на обврзници.
Втора според висината на вложувањата во обврзници, на крај на септември годинава, е НЛБ Банка. Нејзините вложувања во обврзници изнесува 277,45 милиони евра. Во споредба со своите конкуренти НЛБ Банка е најпретпазлива во вложувањата во обврзници во овие девет месеци годинава. Тие се зголемени за само 19,73 милиони евра. Очигледно дека фокусот на вложувањата на врвните менаџери на оваа банка во овој период бил ставен на други приоритети.
Стопанска банка Скопје на крај на септември во обврзници чува 249,5 милиони евра. И покрај тоа што останува трета на листата според вредноста на вкупните пласмани во обврзници во првите девет месеци купувала многу повеќе вакви финансиски инструменти од НЛБ Банка. Нејзините вложувања во обврзници пораснале за 64 милиони евра.
Р.Ф.
