КОЈА КОМПАНИЈА ЗАРАБОТИ 1,5 МИЛИОНИ ЕВРА ОД КАМАТИ И ДИВИДЕНДИ? Не е банка, но половина од добивката е од финансиски приходи
И во 2024 година како и неколку години претходно финансиските приходи од камати и дивиденди креираат половина од вкупната добивка на „Македонијатурист“. Токму зголемувањето на добивката од дејноста преку враќање во фукција или зголемување на искористеноста на хотелските капацитети е најголем предизвик за новите големи акционери во „Македонијатурист“
Најголемата хотелиерска компанија во земјава „Македонијатурист“ лани заработи 1,5 милиони евра од дивиденди и од камати на нејзините вложувања. Вкупната нето добивка на „Македонијатурист“ лани е 2,8 милиони евра, а 1,3 милиони евра се оданочена добивка од дејноста,покажуваат официјалните податоци од неревидираните финансиски извештаи за 2024 година.
Најголемата хотелиерска компанија и лани го задржува приматот на една од најдобрите инвеститори. Нивниот биланс на состојба покажува дека вложувањата во хартии од вредност (акции, удели и обврзници) вредат 32 милиони евра на крајот на 2024 година. Значајно е тоа што вредноста на вложувањата во хартии од вредност е зголемена за 60 отсто лани во споредба со претходната споредбена 2023 година. А тоа во најголема мерка е резултат на растот на пазарната цена на акциите на „Алкалоид“ и „Комерцијална банка“. Овие се премиум македонски акции кои “Македонијатурист“ подолго време ги има во својот инвестициски портфељ.
Што се однесува до резултатите од работењето бројките покажуваат дека од дејностите хотелиерство и угостителство „Македонијатурист“ лани инкасирала 6,6 милиони евра. Во споредба со претходната споредбена година приходите од дејноста се зголемени за 19 отсто. Истовремено оперативните расходи на компанијата изнесуваат 5,25 милиони евра и во споредба со 2023 година се зголемени за само 7 отсто.
Најголемата расходна ставка се трошоците за вработените и тие изнесуваат 1,8 милиони евра и се за 14 отсто повисоки од претходната година. Оперативната добивка на компанијата лани изнесува 1,57 милиони евра. Таа е удвоена во споредба со 2023 годна и тоа е комбинација од раст на приходите и одржување на расходите на исто ниво како и претходната споредбена година.
Данокот на добивка во 2024 година изнесува 232.000 евра.
Од билансот на состојба евидентно е ниското ниво на обврски на „Македонијатурист“: Тековните обврски изнесуваат 1,13 милиони евра и во однос на претходната година бележи раст од 12 отсто. Компанијата нема обврски по краткорочни ниту по основ на долгорочни кредити. Што се однесува до вредноста на вкупните средства половина од нив сочинува сметководствената евиденција на вложувањата во хартии од вредност.
Н.С.
