Клиниката за онкологија апелира за смиреност и доверба: По отворањето на случајот „Онкологија“ воведени драстични промени во третманот на пациентите
По поднесените обвиненија од Основното јавно обвинителство за предметот „Онкологија“, Универзитетската клиника за радиотерапија и онкологија – Скопје денеска излезе со апел до пациентите и јавноста, повикувајќи на смиреност, сталоженост и доверба во работата на клиниката.
„На нашата клиника се воведени драстични промени во работата со цел стандардизирање на третманот на пациентите. Секој случај сега се разгледува на редовни онколошки конзилиуми, каде одлуките се носат врз основа на современи протоколи прифатени од меѓународни стручни здруженија“, информираат од Клиниката, нагласувајќи дека персоналот макотрпно работи во интерес на здравјето и благосостојбата на пациентите.
Апелот следува еден ден по соопштението на обвинителството, кое објави дека предметот „Онкологија“ е поделен на два дела – првиот поврзан со економското работење на клиниката и вториот со третманот на пациентите. Обвинети се поранешниот медицински директор и организацискиот директор за злоупотреба на службена положба, како и четворица онколози за пропусти во лекувањето.
Обвинителката Ана Гоговска Јакимовска соопшти дека е поднесен и предлог за притвор за двајцата директори, кој сега е предмет на одлучување на Основниот кривичен суд – Скопје.
Од Клиниката уверуваат дека случајот се третира со најголема сериозност и дека се преземаат сите мерки за да се врати довербата кај пациентите и јавноста.
