Климовски: Обвинителството ја подигна документацијата од Државна лотарија за јавните набавки, го повикавме и Заводот за ревизија
Покрај двојно повисоките цени за набавка на терминали, во државната лотарија има сомнежи и за други сомнителни набавки и тендери, вели новиот директор Александар Климовски за Алсат. Тој информира дека органите на прогонот ги добиле сите документи и тие веќе се ставени под лупа на истрагата.
„Покрај оваа набавка има и други набавки на потрошен материјал, набавки кои се однесуваат на одредени маркетиншки куќи и така натаму. Има и други тендери откако органите на прогонот по налог на јавен обвинител дојдоа и ја повлекоа целата документација. Се работи за набавки кои се под око на истрагата и сигурно ќе има одреден епилог“, изјави Александар Климовски, директор на Државна лотарија.
Новото раководство на државната лотарија побарало од Државниот завод за ревизија да испрати тим кој ќе изврши ревизија за годините од 2022 до 2025 година.
„Испративме барање до Државниот субјект за ревизија, за да можат согласно нивните можности и капацитети да проверат одредени документи од материјално финансиско работење. Се надевам дека државната ревизија ќе испрати ревизори овде да видат одредени документи, и да проверат дали имало или не неправилности од нивна гледна точка… Во 2025 година, за 2022, 2023, 2024 година“, изјави Климовски.
Тој додаде дека преку новата систематизација ќе се ревидираат и вработувањата во државна лотарија. Месец и пол, откако дојде новото раководство, се работи за скратување на договорите.
Од сите 70 вработени од оваа категорија, на 35 вработени им се раскинати договорите. Директорот рече дека е констатирано дека за некои од нив немало потреба, додека некои воопшто не дошле на работа.
