„КЛИЕНТИ НИ СЕ ПОРШЕ, БМВ, МЕРЦЕДЕС, ЈАГУАР“ – сѐ за автомобилската индустрија во поткастот Бизнис муабети со Виктор Мизо од „Костал“ на Фактор

Успешен во бизнисот, а претходно успешен и во раководењето со Дирекцијата за слободните индустриски зони, на која дојде директно од САД, каде што претходно живеел и работел 18 години. Првично го прифаќа предизвикот да и помогне на државата на економски план, но се уште е тука, успешно менаџирајќи ја „Костал Македонија“, каде што е генерален директор, но ја има и позицијата претседател на Асоцијацијата на странски компании со технолошко напредно производство. Има многу што паметно и интерсно да се слушне од Виктор Мизо, прв човек на „Костал Македонија“, само за поткастот Бизнис Муабети на Фактор. 

Откриваме дел од разговорот, а утре ќе можете да го погледнете целиот поткаст. 

„Костал е германска фамилијарна компанија, која има традиција од 112 години откако е формирана. Четврта генерација, сопственикот Андреас Костал ја води компанијата. Компанијата има годишен обрт од околу четири милијарди евра. Најголем дел, околу 85 отсто од обртот е во автомобилската индустрија, но прави и индустриска електроника, прави и системи кои се поврзани со обновливи извори на енергија, а минатата година купивме германска компанија која произведува полначи за електрични возила и ги пласира своите производи во Централна Европа. Имаме 20.000 вработени, на пет континенти, во над 40 држави“, вели Мизо.

Автомобилската индустрија не е индустрија каде што има големи профитни маргини. Дури и профитна маргина од 5 до 6 проценти не е лесно остварлива, посебно во последниве шест до седум години на многу турбулентни времиња во светот, не само во нашата индустрија, туку геополитички, геостратешки и здравствени кризи кои ги имавме. 

Она што ние го произведуваме е пред се за премиум брендови на автомобилски возила, дури и од Охрид клиенти ни се Порше, БМВ, Мерцедес, Јагуар, Ленд Ровер и слично. Правиме комплексни мехатронски производи, но и енергетска електроника за плагини и хибридни возила. 

Пред да го почнам политичкиот ангажман, крај на 2006, почеток на 2007 година, претходно 18 години живеев во Америка, таму и завршив високо образование. Јас сим инженер, кој и претходно има работено во автомобилската индустрија. 

На прашањето на водителот Мишко Иванов дали се кае што се вратил во Македонија, Мизо вели:

„Искрено, мене ми беше некаков предизвик кога ми беше понудена работата да помогнам во економскиот развој на државата и привлекување на странски инвестиции. 

Иванов вели „Сигурно сте ги слушале муабетите дека сте ја искористиле тогашната позиција Директор на дирекцијата слободни зони за да ја добиете позицијата прв човек на „Костал Македонија“, на што Виктор Мизо возвраќа „Дали вие мислите дека странските компании така ги земаат луѓето?“, и доидава „Кога се смени власта, јас останав на работа уште два месеци без проблем, но тогаш јас директно на тогашниот премиер Заев му ја поднесов мојата оставка….“