Кедев: Стојам комплетно зад тоа што го кажав во врска со злоупотребите при кардиохируршки интервенции

Кардиологот Сашко Кедев ја потврди својата јавна изјава за злоупотребите при кардиохируршки интервенции, истакнувајќи дека тоа го има кажувано и претходно пред други здравствени авторитети. „Основната моја мотивација е да расчистиме со неправилностите таму каде што можеме“, изјави Кедев. Неговите тврдења доведоа до формирање комисија од домашни и странски експерти која треба да утврди дали имало непотребни операции и стентирање.

Во гостувањето во ТВ Алфа, Кедев оцени дека овој пат здравствениот систем реагирал соодветно. Комисијата анализира случаи што ги доставиле лекари од Клиниката за кардиологија и Државната кардиохирургија. „Целта е да се воведе контрола и да се подобри системот, кој сега е предмет на најголеми инвестиции“, рече Кедев, додавајќи дека ова е можност за воведување на соодветни механизми за превенција на неправилности.

Тој нагласи дека неправилностите не се од неодамна, туку датираат многу години наназад. „Сегашниот министер за здравство не е инволвиран во овие случаи. Се надевам дека формирањето на домашната и меѓународната комисија, заедно со Лекарската комора, ќе помогне да се расчисти ситуацијата“, посочи Кедев.

Кардиологот истакна дека треба да се направат проверки и во јавното и во приватното здравство, а наодите да бидат евалуирани од меѓународни експерти. Според него, многу често конзервативен пристап е подобар од инвазивни процедури, а пациентите треба да добијат информации за здрав животен стил, исхрана и медикаментозна терапија.

„Постојат јасни случаи каде не треба ништо да се прави, што е докажливо со документацијата, како ангиографски филмови и снимки од процедурите. Доказите може да ги евалуираат само компетентни експерти – интервентен кардиолог или кардиохирург“, заклучи Кедев.