Казна за странската инвестиција „Кранфилд Фаундри“, треба на државата да и врати повеќе од 2 милиони евра
Пробиштипската леарница „Кранфилд Фаундри”, треба да и плати казна на државата и на владата да и ја врати државната помош во висина од над 2 милиони евра.
Ова било одлучено на владина седница во текот на јануари, објави денес ММС, а казната што треба да се плати е половина милион евра, додека државната помош што треба да се врати изнесува 101.056.278 денари.
Ваквиот епилог следува откако странскиот инвеститор од индустриската зона Неокази не ги реализирал планираните инвестиции во висина од 20 милиони евра како услов, иако за тоа добил одложен рок од две години поради ковид-кризата.
-Имајќи ја предвид неможноста компанијата навремено да ги исполни преземените договорни обврски во утврдените временски рокови поради состојбата предизвикана од пандемијата КОВИД-19, а која како резултат на забавување на глобалната економија имаше директно влијание на работење на „Кранфилд Фаундри”, Владата тогаш во текот на 2021 и 2022 година склучи два анекси кон договорот, со цел да излезе во пресрет на компанијата и во два наврати го пролонгираше временскиот рок за исполнување на договорните обврски. Па така, наместо првичниот рок за исполнување на обврските од 31.07.2020 година, компанијата доби дополнителни две години за реализирање на минималната инвестиција, односно до 31.07.2022 година, стои во одоговорот од Владата.
