Касами предупредува: Можни се обиди за создавање меѓуетнички тензии во предизборниот период
Во предизборниот период постои тенденција за создавање меѓуетнички тензии на целата територија на државата, а особено во западниот дел, изјави синоќа градоначалникот на Тетово, Биљал Касами. Тој нагласи дека најголем ризик постои во регионот на Тетово, каде што мнозинско население се Албанците.
„Добивме информации од пријатели од соседните земји дека имало обид да се ангажираат одредени групи за да се запали џамијата на Попова Шапка. Тоа би било јасен сигнал дека нешто сериозно не е во ред во државата. Ние ги прибираеме сите вакви сознанија и ќе ги споделиме со партнерските држави, бидејќи како членка на НАТО, секоја закана за безбедноста на Македонија претставува закана и за Алијансата“, изјави Касами.
Тој додаде дека постои соработка со безбедносните служби за да се превенираат можни инциденти.
„Укажано ни е дека треба да бидеме поагилни и повнимателни. Затоа апелираме да нема поголеми собирања на луѓе без претходно известување на институциите, особено кога станува збор за навивачки групи. Службите имаат инструкции да спречат собирање на големи групи млади, за да не се повторуваат немили настани од минатото“, рече Касами.
Овие информации Касами ги соопшти на настан организиран од Општина Тетово, на кој беше промовирана новата четиригодишна стратегија за развој на туризмот. Во неа посебен акцент е ставен на агро-туризмот и развојот на селскиот туризам во шарпланинските села.
