Изненадувачки посети: Зеленски кај Бахмут, Путин во Мариупол, принцот Вилијам во Полска
Изненадувачката вест од вчера беше дека украинскиот претседател Володимир Зеленски се најде на фронтот кај градот Бахмут, во источна Украина. Неговата посета таму дојде во време кога шефот на приватната воена компанија „Вагнер“ Евгениј Пригожин вели дека самиот Бахмут е 70 отсто под контрола на „Вагнеровите борци“.
Во Бахмут, Зеленски се сретна со украински војници, кои ги одликува со воени одликувања. „Доњецка област. Позиции од прва линија на украинската војска во правец на Бахмут“, напиша Зеленски во Телеграма по повод посетата на линијата на фронтот. Неговото патување дојде додека проруските сепаратисти кои се борат заедно со руската армија велат дека Бахмут е речиси опколен.
На снимката што Зеленски ја постави на Телеграма од посетата на фронтот кај Бахмут, тој е во хангар, без заштитна опрема, но придружуван од тешко вооружени стражари. На снимката се гледа како Зеленски им дели медали на украинските војници во борбена опрема.
„Чест е да им доделуваме медали на нашите херои, да ви подадам рака и да ви се заблагодарам што ја заштитувате нашата земја и суверенитет“, им рече Зеленски на војската.
„Вие имате тешка, но историска судбина, да ја браните нашата земја и да вратите сè во Украина, за нашите деца“, додаде тој, пред да им оддаде почит на војниците убиени во источна Украина и воопшто во оваа војна.
Некои војници направија селфи со шефот на државата, а сопругата на еден украински војник го прегрна.
Посетата на Зеленски на фронтот во регионот Бахмут дојде во особено напорен ден во однос на непријателствата. Русија испрати 21 беспилотно летало Shahed 136/131 од иранско производство против Украина. Украинската армија увери дека соборила 16 од нив. Покрај тоа, руските сили истрелаа проектили кон Украина и имаше многу бомбардирања. Зеленски сето ова го опиша како уште една ноќ на руски терор.
Најмалку 7 лица загинаа, а 9 се повредени кога средното стручно училиште во Ржишчев, град на околу 80 километри јужно од Киев, беше погодено за време на напади со беспилотни летала, изјави Андриј Небитов, началник на полицијата во регионот Киев. Во друг напад, едно лице загина, а 32 се повредени, меѓу кои три деца, кога две ракети погодија станбена зграда во Запорожје, во јужна Украина, соопштија локалните власти.
Русија вчера се пофали дека го одбила нападот со дрон врз Севастопол, четири дена по посетата на рускиот претседател Владимир Путин на Крим по повод деветгодишнината од анексијата на полуостровот. Рускиот министер за одбрана Сергеј Шојгу се пофали дека руските сили вчера успеале да уништат три непријателски беспилотни летала, а немало жртви.
