Ивановска не ги дава гласовите: Секој граѓанин си е здраворазумен и има одговорност за својот глас
Кандидатката за градоначалничка на Општина Центар, Билјана Ивановска, која изборната трка ја заврши во првиот круг со освоени 4.465 гласа, порача дека нема да ги повикува граѓаните да гласаат за еден или друг кандидат, бидејќи секој граѓанин има своја одговорност и право на избор.
„Голем број граѓани препознаа вредности и без особена кампања, затоа што тоа се свесни луѓе кои наместо да негодуваат, преземаат акција и одговорност. Кој и да победи, важно е да ги штити јавните интереси и уставното право на здрава животна средина, како и активно учество на граѓаните во донесувањето одлуки“, изјави Ивановска на прес-конференција, одржана заедно со избраните советници од платформата „Независни заедно“.
Таа нагласи дека охрабрува фактот што во Центар постои критичка маса граѓани кои не размислуваат по партиски шеми, туку се подготвени сами да придонесат за промени.
Во таа насока, Ивановска истакна дека е неопходно да се ревидираат и усогласат деталните урбанистички планови со Генералниот урбанистички план, а дозволите за градба кои се издадени врз основа на несоодветни планови треба да бидат јавно објавени.
„На располагање ѝ ја ставаме на Општината мапата што ја изработи иницијативата ‘Шанса за Центар’, со евидентирани над 150 градби. Општината треба само да ја одржува и ажурира таа мапа“, додаде таа.
Ивановска најави дека советниците од „Независни заедно“ ќе делуваат конструктивно и транспарентно, ќе поддржуваат проекти од интерес на граѓаните, но ќе бидат и „гласни критичари на сите сомнителни одлуки“.
Носителката на советничката листа за Град Скопје, Јана Белчева – Андреевска, најави дека платформата ќе продолжи со собирање потписи за регистрација како граѓанско-политичко здружение.
„Поради нееднаквите услови и бројните препреки за независните кандидати, како и поради намаленото ниво на демократија, решивме да ја институционализираме платформата ‘Независни заедно’. Ги повикуваме сите независни групи низ земјата да ни се приклучат“, изјави Белчева – Андреевска.
