Италијанците продадоа 12,5 отсто од акциите на најстарата банка во светот за 650 милиони евра

Италија продаде 12,5 отсто од акциите на најстарата активна банка во светот, Monte dei paski di Siena (MPS), за 650 милиони евра како дел од плановите за приватизација.

Италијанското Министерство за економија и финансии соопшти дека ги понудило акциите на банката по цена од 4,15 евра, нудејќи попуст од 2,49 отсто во однос на цената на затворањето во вторник.

Како што јави АНСА, во 2017 година италијанската држава презеде 64,2 отсто од акциите во MPS со цел да и помогне на оваа банка.

Во ноември минатата година, италијанската влада продаде 25 отсто од акциите на MPS, намалувајќи го својот удел на 39,23 отсто.

По трансакцијата, државата поседува околу 27 отсто од акциите во Монте деи паски ди Сиена и најави дека банката ќе биде целосно приватизирана кога ќе се исполнат пазарните услови.