Интер владее во Милано – го презгази Милан со најубедлив триумф по скоро пола век! (ВИДЕО)

Интер, кој заедно со Јувентус се први фаворити за „скудетото“ остана перфектен со четвртата победа сезонава, а вечерва го распарчија градскиот ривал за најубедлив триумф после безмалку пола век, зашто последен пат „нераѕурите“ славеа со 5-1 против Милан во 1974 година.

Интер со оваа џиновска победа ја продолжија серијата започната од јануарскиот триумф со 3-0 во Суперкупот, па победата во Серија А со 1-0 во февруари и потоа двете победи со 2-0 и 1-0 во полуфиналето во Лигата на шампионите.

Нешто повеќе од пола час на Интер му требаше да исчекори кон победата, прво Хенрик Мхитарјан со гол за водство во петтата, па Маркус Турам со прекрасен гол во 38-та минута.

Marcus Thuram, TAKE A BOW. WHAT A HIT! ⚽️🚀🇫🇷 pic.twitter.com/cCT57Ll53F

— Inter Xtra (@Inter_Xtra) September 16, 2023

Милан преку Рафаел Леао во 57-та се врати во мечот, имаше неколку минути потоа ветувачки напад за втор гол кој го упропастија Рејндерс и Леао, па сѐ заврши откако Мхитарјан во 69-та ја врати предноста од два гола.

Екс-миланезот Хакан Чалханоглу од пенал во 79-та само ги дотепа откако Лаутаро Мартинез избори удар од белата точка, а Давиде Фратези во 93-та минута постигна и петти гол.

За Милан ова е прв сезонски пораз, па „росонерите“ остануваат на девет бода сега на третото место, пред нив е Јувентус со 10 и Интер кој е лидер со максималните 12. Интер пак со воведните четири гола и гол-разликата 12-1, само најави дека сезонава е најсериозен кандидат за „скудетото“.