Иницијативата за реформи во ИВЗ: Исламската заедница е обезличена, вината ја сноси и Уставниот суд и ДУИ
Иницијативата за реформи во Исламската верска заедница (ИВЗ) излезе со остра реакција, обвинувајќи ја раководната структура на ИВЗ, Уставниот суд и партијата ДУИ за „деинституционализација и обезличување на муслиманите во Македонија“.
Во писмената реакција, потпишана од проф. д-р Бејадин Амети, се критикува начинoт на кој е трансформирано средното теолошко училиште „Иса Бег Медреса“, обвинувајќи ја ИВЗ дека наместо да се соочи со реалните предизвици, прибегнува кон замена на вистинските виновници. Проблемот, велат од иницијативата, датира од 2008 година кога средното образование стана задолжително, а Медресата почнала да запишува ученици кои немале интерес за исламската теологија, со што се нарушил основниот идентитет на институцијата.
На критика е изложена и последната одлука со која, според Иницијативата, Шаќир Фетаху со „неквалитетна владина одлука“ го укинал оригиналното училиште и формирал приватна гимназија со истото име, со што, како што наведуваат, е укинато 600-годишно исламско наследство.
Во реакцијата остро се осудува и Уставниот суд. Изјавите на претседателот Дарко Костадиновски и судијката Ана Павловска-Данева се оценети како „неуставни и неписмени“, а судиите се обвинуваат дека не го разбираат принципот на секуларноста. Иницијативата вели дека во судот „реинкарнирале Енвер и Неџмие Хоџа“, алудирајќи на агресивен секуларизам.
ДУИ, пак, е обвинета дека две децении „ја заробила и понизила ИВЗ“, особено од 2013 година кога, според Иницијативата, партијата целосно ја презела верската институција.
Иницијативата бара итни измени на Законот за верски заедници и трансформација на Комисијата за односи со верските заедници, со цел враќање на автентичната улога и углед на Медресата, преку државна акредитација и квалитетна теолошка настава.
„Само така, училиштето ќе може повторно да продуцира квалитетни кадри, признати не само во Македонија, туку и пошироко“, порачуваат од иницијативата.
