Инфраструктурен објект е оштетен во напад на руски дрон врз Киев, соопштија украинските власти
Русија синоќа втора ноќ по ред изврши неколку бранови напади со беспилотни летала врз Киев, засилувајќи ги нападите врз главниот град на Украина по пауза од неколку недели, соопшти воената управа на регионот Киев, цитирана од Ројтерс.
Како резултат на нападите, бил оштетен инфраструктурен објект во регионот на Киев, објави на својот Фејсбук профил шефот на воената управа на регионот Руслан Кравченко, цитиран од агенцијата Укринформ .
“Втора ноќ по ред руските сили го нападнаа регионот на Киев со беспилотни летала. Воздушната тревога траеше речиси пет часа. ПВО во регионот на Киев беше навремено активирана”, рече Кравченко.
Според него, за време на нападот бил оштетен инфраструктурен објект во еден од регионите на Киевската област. Според првичните податоци, нема жртви или повредени. Пожарот предизвикан од ударот сега е изгаснат.
Сите служби за итни случаи работат на утврдување и санирање на штетите од нападот, додаде Кравченко.
Украинската противвоздушна одбрана синоќа собори 15 од вкупно 20 руски ударни беспилотни летала Шахед-136 насочени кон Украина, пренесува Украинформ.
