„ИНФЛАЦИЈАТА ЗАБРЗА, ПОТРЕБНА Е ПРЕТПАЗЛИВОСТ“: Фајненс тинк и понатаму очекува раст на домашната економија
Во вториот квартал од 2024, БДП се зголеми за 2,3 отсто на годишна основа, забрзувајќи во однос на претходните квартали, што е во линија со очекувањата изразени во претходниот
Макроекономски монитор, посочуваат од Институтот за економски истражувања и политики „Фајненс тинк“.
Притоа напоменуваат дека ова забрзувње на домашната економија е резултат на забавениот пад на извозот (-2,9 проценти), и повторното интензивирање на падот на увозот (-4,5 отсто), како и на растот на
јавната потрошувачка (3,5 проценти).
– Растот на јавната потрошувачка се поврзува со значајното продлабочување на буџетскиот дефицит од 5,8 отсто за првото полугодие од годината, наспроти првичната
годишна проекција од 3,6 проценти. Во вториот квартал, бруто инвестициите забележуваат благ пад (-1,7 отсто), додека приватната потрошувачка расте со благо забавена динамика (1,3 проценти) – нагласуваат од „Фајненс тинк“ во нивниот последен Маркоекономски монитор.
Притоа укажуваат дека на производната страна, како и претходно, растот на БДП произлегува главно од растот на услугите (3,6 отсто), иако во овој квартал позитивни движења бележат градежништвото
(5,1 процент) и преработувачката индустрија (0,7 отсто), по падовите во претходните квартали.
– Невработеноста во вториот квартал од 2024 понатамошно се намали на 12,5 отсто. За првпат по повеќе квартали, пазарот на труд манифестира помала воздржаност од претходно,
имајќи предвид дека се креирани близу 4,500 нови работни места, а активноста на населението се задржа како претходно (52,1 отсто). Сепак, забележливо е дека најголем дел од
работните места се создадени во земјоделството и индустријата, додека главните услужни дејности, како трговијата, забележаа намалување на бројот на работни места, и
покрај растот на создадената вредност – појаснуваат од Институтот.
Појаснуваат дека во вториот квартал од 2024, инфлацијата благо забрза на 3,9 отсто (од претходните 3,4 проценти) на годишна основа.
– Иако овие движења кај цените се во линија со очекувањата за целата
2024 година, преостанатите пренесени ефекти врз цените, потенцијалните варијации кај одредни групи производи, притисокот што доаѓа од стабилниот пазар на труд и растот на
платите (13,3 отсто), како и од потезите на фискалната политика, укажуваат на потребата од понатамошна претпазливост.
Благата позитивна динамика на економијата се очекува да продолжи во 2024 година. Изгледите во поглед на инфлацијата остануваат релативно поволни, но зависат од се’ уште
присутни критични фактори. Finance Think ги задржува претходните проекции за раст на БДП во 2024 од 2,7 отсто и за раст на цените од 3,8 проценти – се нагласува во мониторот.
