ИНФЛАЦИЈАТА ВО ЕУ ПОРАСНА: Романија, Белгија и Хрватска бележат најголеми поскапувања
Инфлацијата во ЕУ благо забрза во мај, првпат од крајот на 2023 година, следејќи го трендот во еврозоната, се наведува во извештајот на Европската статистичка служба „Евростат“.
Годишната стапка на инфлација во Еврозоната минатиот месец изнесуваше 2,6 отсто, што претставува раст за 0,2 процентни поени во однос во однос на априлските 2,4 проценти, додека на ниво на цела ЕУ таа достигна 2,7 отсто или за 0,1 процентен поен повеќе во однос на април 2024 кога изнесуваше 2,6 проценти, соопшти Евростат.
Цените во мај пораснале за 2,6 отсто
Цените во еврозоната во мај пораснаа за 2,6 отсто, додека пак во април тие биле за 2,4 отсто повисоки во однос на истиот месец лани. Растот на цените забрза во мај и во еврозоната и во ЕУ за прв пат од крајот на минатата година.
На месечна основа, цените во двете области во мај пораснале за 0,2 отсто, пресмета Европскиот завод за статистика. Во претходниот месец тие се зголемија и во еврозоната и во ЕУ за 0,6 отсто.
Најскапите услуги
Во мај цената на услугите најмногу пораснала во еврозоната, за 4,1 отсто во однос на истиот период лани. Цената на свежата храна порасна за 1,8 отсто, посилно од претходниот месец. Цените на енергијата се зголемија за прв пат по нешто повеќе од една година, за благи 0,3 отсто, пресметаа статистичарите.
Во мај 2023 година, годишната стапка на инфлација во еврозоната беше 6,1 отсто, а во ЕУ 7,1 отсто.
Скок во Романија
Највисока годишна стапка на инфлација во ЕУ во мај забележа Романија, од 5,8 отсто, објави Евростат. Следеа Белгија и Хрватска, членки на еврозоната, со раст на потрошувачките цени мерен со ХИЦП за 4,9 односно 4,3 отсто во однос на ланскиот мај. Во април цените мерени со ХИЦП се зголемија во Хрватска за 4,7 отсто.
Во групата земји со раст на цените блиску до нивото од четири отсто се и Унгарија, Шпанија и Португалија, каде што забележаа раст од приближно 3,8 отсто. Финска забележа најниска годишна стапка на инфлација во мај, од 0,4 отсто.
Во Летонија цените стагнираа, покажува извештајот на Евростат.
