Имало место за 200, а внатре биле 700 луѓе – прекинат настапот на Аца Лукас поради прекршување на законските прописи
Настапот на познатиот српски турбо-фолк пејач Аца Лукас во петокот во популарен локал во Кавадарци бил ненадејно прекинат околу полноќ, иако вечерта започнала во одлична атмосфера. Според сведоштва на присутни, кои кружат на повеќе портали и социјални мрежи, полицијата влегла во објектот и го стопирала настапот поради сомнежи за прекршување на повеќе законски прописи.
Градоначалникот на Кавадарци, Митко Јанчев, за телевизија Сител изјави дека организаторите побарале од општината дозвола за користење дополнителен јавен простор за поставување маси, шанкови и урбана опрема за потребите на настапот, но барањето било одбиено од безбедносни причини.
„Општината заедно со комисија излезе на терен и утврди дека нема услови за поставување дополнителни маси. На 14 и 11 месец официјално беше одбиено решението и сопственикот беше известен и писмено и усно“, рече Јанчев.
Тој нагласи дека кафетеријата има капацитет за околу 200 гости, а внатре биле присутни повеќе од 700 лица, што значело тројно надминување на дозволениот број. Дополнително, работното време на локалот е ограничено до еден час по полноќ, а настапот се одвивал подолго.
Според градоначалникот, ангажманот на изведувачот не бил пријавен ниту во Агенцијата за вработување, ниту во Министерството за труд, што претставува уште едно прекршување.
„Како општина која работи транспарентно и ажурно, нема да дозволиме да се повтори нешто како трагедијата што ја видовме пред неколку месеци во Кочани. Нема да дозволиме пренатрупани локали без основни безбедносни мерки“, истакна Јанчев.
Полицијата засега не објави дополнителни детали за прекинот, но случајот предизвика големо внимание во јавноста, особено поради масовноста на случувањето и безбедносните ризици. Очекувања се дека инспекциските служби ќе спроведат дополнителни проверки во локалите во градот.
