Идните пожарникари два дена во клупа, па очи в очи ќе се соочат со огнот
На 13 локации низ државата започна обуката за идните припадници на противпожарните служби. Обуката започнува со теоретска настава, а по два дена учесниците ќе се соочат со реални услови – вежби за гаснење пожари на отворено. Сепак, првично ќе бидат распоредени на терени со низок ризик, додека не ги совладаат вештините и техниките за гаснење и користење на опремата.
Во Скопје, од вкупно 50 пријавени кандидати, на обуката се појавиле 34. Дел од останатите не биле примени поради нецелосна или неуредна документација.
Оваа обука се спроведува во рамки на владината мерка за ангажирање на лица за превенција од пожари. Учесниците кои успешно ќе ја завршат обуката ќе бидат вклучени во тимовите на Дирекцијата за заштита и спасување и противпожарните бригади, со склучени договори за нивниот ангажман.
Засилувањето на капацитетите на терен е од клучно значење, особено во услови кога во еден ден, како што беше случајот на 27 јули, беа регистрирани пожари на 51 локација низ државата. Поради обемот на пожарите, тогаш беше побарана и меѓународна помош – која пристигна од Чешка и Словенија.
