Хуманитарна трка во чест на Иле од Кочани – возачот херој од Брзата помош кој 11 пати возеше до Скопје
На 6 септември ќе се одржи првото издание на хуманитарната трка „Голак Треил“, спортски настан кој комбинира планинско трчање и брзо одење по делници низ живописните предели на планината Голак. Трасата е внимателно избрана и ќе опфати совладување на одредена надморска височина, нудејќи уникатно спортско и рекреативно искуство.
Оваа година трката е посветена на Иле Гоцевски, возач во Брзата помош од Кочани, кој трагично почина, а зад себе остави пример на хуманост и пожртвуваност. Во негова чест, патеката ќе биде долга 11 километри, бројка која симболично го претставува бројот на неговите возења до Скопје во обид да спаси човечки животи.
Настанот е отворен за сите љубители на спортот, природата и авантурите. Средствата од котизациите ќе бидат донирани на организацијата Support Кочани, со што настанот добива силен хуманитарен карактер.
Главната цел на „Голак Треил“ е промоција на природните богатства на планината Голак и поттикнување на активниот туризам во источниот регион на Македонија. Планината е позната по својата специфична комбинација на три клими – континентална, планинска и медитеранска, што ја прави вистинска „воздушна бања“ и идеално место за рекреација и спорт.
„Со оваа трка сакаме да придонесеме за развој на планинскиот туризам и да го вклучиме Делчево и околината во туристичката мапа на Македонија. Источниот регион има голем потенцијал, кој преку вакви иницијативи може да се развива и да создава нови можности за локалната заедница. Веруваме дека ќе поттикнеме повеќе луѓе да се свртат кон здрав живот, спорт и активен одмор во природа“, порачуваат организаторите.
