ГТЦ ја зголеми наплатата, но и натаму работи со загуба
Градски трговски центар – Скопје ги зголеми приходите за 4 отсто во текот на 2024, објавено е на платформата на „Македонска берза“.
Некогашниот симбол на скопското модерно живеење минатата година наплатил 257 милиони денари, односно околу 4,2 милиони евра. Сепак и тоа не било доволно да се оствари добивка. Загубата изнесува 350.000 евра и е нешто помала од една година претходно.
Најголем дел од трошоците се за плати за вработените. Исплатата на работниците е 2 милиони евра на годишно ниво и бележи раст од 18 отсто.
Најголем дел од приходите на ГТЦ се од паркингот и закупнините што ги наплатува од корисниците на деловните објекти што ги издава.
Во проформа образложението за остварениот резултат доставено до „Македонска берза“ раководството најавува дека оваа година ќе се фокусира на поголема наплата „со максимално ангажирање и целосно искористување на капацитетите со кои располага“.
Угостителско-туристичкиот менаџер Никола Соколовски од ноември минатата година е назначен за нов извршен директор на акционерското друштво. Тој дојде на местото на Ѓоко Трајчевски, кадар кој имаше поддршка од претходната власт. Претходните две години бил оперативен директор на скопскиот „Интернешнл хотелс“ (поранешен „Континентал“ н.з.).
Истовремено променет е комплетно целиот Управен одбор на шопинг центарот, а сега има седум наместо претходните шест членови. Покрај Соколовски, членуваат уште и Ферик Белули, Јован Лукаров, Катица Грче, Виолета Блажевска, Васе Ангеловски и Александар Тасев.
ГТЦ е компанија која порано беше трговска гордост на Скопје. И сега е едно од најфреквентните места, но неговата репутација не е ниту сенка од тоа што била пред дваесетина и повеќе години.
Камен околувратник на државната компанија е превработеноста. А тоа е потврдено и во извештајот на директорите. Но, заради мир во политичките коалиции на власт досега никој не посегаше да го решава најголемиот проблем. ГТЦ има околу 200 вработени, а главна дејност му е да одржува деловни простори во вкупна површина од 46.000 квадратни метри.
А.К.
