Георгиевски: Член 353 – тоа што Груевски го сруши сега плаче да му се донесе!
Поранешниот премиер Љубчо Георгиевски вчера упати критики за поранешниот премиер Никола Груевски, кој откако избега од Македонија доби азил и престој во Унгарија.
„Груевски тоа што сам го сруши сега плаче да му се донесе – Членот 353!“, порача Георгиевски вчера при гостување на емисијата „Трилинг“.
Тој вели дека членот 353 е член со најголема историја во македонскиот правосуден систем.
„Кога почна транзицијата раните 90-ти последната комунистичка власт членот 353 го тргнаа и го избришаа. Првите 10 години од македонската транзиција кога беа најголемите приватизации членот 353 не постоеше. Овој член го врати нашата влада кога беше министер Камбовски за да ги уплашиме тие на политичката сцена да бидат повнимателни. Овој член е напишан и изгласан од мојата влада“, вели Георгиевски.
Тој вели дека отпосле тогашниот премиер Бранко Црвенковски апсел по овој член. Затоа биле принудени законот да се конкретизира, а тоа не поминало кај Груевски.
Инаку, Груевски во последно време е во т.н. војна со ВМРО-ДПМНЕ откако во јавноста се шпекулира дека имал тајни разговори со власта за гласање на уставните измени.
