(ФОТО) Протести пред министерствата, се бара додаток на плата
Вработените во Министерството за животна средина и просторно планирање, Министерството за дигитална трансформација, Министерството за шумарство и водостопанство, Министерството за правда, Министерството за култура и туризам, Министерството за економија и труд, Министерството за транспорт, Државниот завод за статистика и Државниот архив од денес започнаа со протест со барање на додаток на плата од 30 отсто.
“Почнуваме денес во вторник, бидејќи денес се одржува седница на Владата и апелираме на денешната владина седница да се стави точка на дневниот ред со која ќе се изнајде начин да се обезбедат средства од Буџетот за решавање на овој долгогодишен проблем на вработените” – кажа на прес конференцијата претседателот на Синдикатот на УПОЗ Трпе Деаноски.
Од синдикалната организација велат дека договорените предлог – колективни договори се поднесени до Министерството за финансии пред носење на Буџетот за 2025 година, но од неразбирливи причини не се одобрени средства за нивно потпишување.
„Висината на платите на вработените во институциите кои денес протестираат почнува од 25.010,00 денари. Просечната плата во овие институции е околу 29.000,00 денари, а просечната плата исплатена на ниво на држава изнесува 42.124,00 денари.
Додатокот што го бараме од 30 отсто значи дека вработените би добиле 6000 денари зголемување на плата, но и покрај тоа сите вработени повторно ќе бидат под просечната плата на државата.
Ова барање е старо повеќе од 4 години. За овој додаток на плата сме протестирале и сме штрајкувале години наназад, но за жал ниту една влада до сега не излезе во пресрет на нашите барања“, додаде Деаноски.
Протестите ќе продолжат во текот на оваа недела секој ден од 11:00 до 11:30 часот, а во петок вработените од министерствата ќе протестираат пред Министерството за финансии од 11:00 до 12:00 часот.
