ФОТО Малата Софија ја победи најтешката битка – ѕвончето на Детската клиника заѕвони за нејзиниот нов почеток
На само три години, Софија ја извојува најголемата битка – победа над леукемијата. Пред еден месец, облечена во костим и со блесок во очите, храбро го заѕвони ѕвончето на Детската клиника во Скопје – симбол на крајот на долгото и тешко лекување и почеток на еден нов, посветол живот.
Нејзината мајка, Кристина, се присетува на тој моќен момент, полн со емоции, солзи, но и неизмерна гордост.
– Малку срамежливо, но со моја помош, Софија го заѕвони ѕвончето. Звукот останува врежан во срцето засекогаш, раскажува таа за Фемина.
Борбата започнала ненадејно, во септември минатата година, кога Софија имала само две и пол години. Сосема случајно, поради висока температура, направиле крвна слика која покажала загрижувачки резултати. По дополнителни испитувања на Детската клиника, семејството ја добило страшната дијагноза – леукемија.
Следувале девет месеци исполнети со неизвесност, изолација и хемотерапии, далеку од блиските и од секојдневните радости што ги живее секое дете.
– Најтешко беше кога моравме да се откажеме од родендени, празници и семејни собири. Но, знаевме дека се бориме за нејзиниот живот – вели Кристина.
Во тие најтешки денови, огромна поддршка бил медицинскиот тим на хемато-онколошкиот оддел, кој освен професионализам, секојдневно покажувал и човечност, топлина и сочувство.
– Гледајќи ги пожртвуваните мајки таму, сфатив дека нема посилна мајка од мајка на дете што се бори со рак. Сакам да порачам на сите што се во оваа битка – не губете верба, бидете храбри и истрајни. Верата и љубовта даваат сила што не можете ни да ја замислите – порача Кристина.
Денес, Софија чекори кон ново, безгрижно детство. А ѕвончето што го заѕвони таа, по неа го заѕвонија и други деца, со надеж дека сите мали борци ќе ја добијат оваа битка и дека Детската клиника ќе биде место на уште многу вакви победи.
