Финската премиерка Сана Марин се разведува
Премиерката во заминување на Финска, 37-годишната Сана Марин, се разведува по три години брак.
„Благодарни сме за 19 години заедно и нашата сакана ќерка. Ќе останеме најдобри пријатели“, објави Сана на својот Инстаграм профил. Истата порака ја објави и нејзиниот наскоро поранешен сопруг Маркус Раиконен.
Марин и Раиконен имаат заедно петгодишна ќерка. Тие се венчаа во 2020 година додека Марин се соочуваше со пандемијата како премиер. „Ја живеевме младоста заедно, заедно влеговме во зрелоста и заедно пораснавме да бидеме родители на нашата скапоцена ќерка“, напиша таа на Инстаграм по нивната венчавка во август 2020 година.
Марин и нејзината Социјалдемократска партија загубија на парламентарните избори во Финска минатиот месец. После тоа таа најави дека ќе ја напушти челната позиција во партијата. Кога ја презеде функцијата во 2019 година, таа стана најмладата премиерка во светот.
Скандал за забава
Минатата година таа беше во центарот на скандал поради видеото на кое се забавува во друштво, на кое се гледаа чаши алкохол. Финската опозиција и некои пратеници побараа од неа да направи тест за дрога, што таа и го направи, а тестот беше негативен.
Скандалот продолжи кога се појави ново видео на кое финскиот премиер танцува со пејачот Олави Уусивирт.
