Филипче ќе ја достави резолуцијата за црвените линии, Мицкоски ја отфрла идејата
Претседателот на СДСМ, Венко Филипче, оваа недела ќе ја достави резолуцијата за црвените линии во преговорите за членство со Европската унија. Тој останува на ставот дека документот мора да се разгледа, иако премиерот Христијан Мицкоски викендов ја отфрли иницијативата.
„Не гледаме дека се трудат нешто да направат околу тоа. Нема дипломатска активност. Очигледно е дека се конзистентни во тоа да нема преговори со ЕУ, а ние тоа нема да го дозволиме,“ изјави Филипче.
Тој додаде дека содржината на резолуцијата ќе биде објавена деновиве и очекува за неа да се разговара и на лидерска средба. „Ако има чесен пристап од власта, ќе седнеме и ќе разговараме – во парламент, на лидерска средба, со најголемите партии,“ потенцираше лидерот на СДСМ.
Премиерот Мицкоски оцени дека позицијата на Владата е јасна и дека треба борба со аргументи, а не со „итроштини“. Министерот за надворешни работи Тимчо Муцунски пак, ги посочи СДСМ и ДУИ како виновници за блокадата, бидејќи, како што рече, токму тие партии спречиле да почнат преговорите.
Еврокомесарката Урсула фон дер Лајен при посетата на Бугарија не даде директен одговор на прашањето за „план Б“ за Македонија. Таа истакна дека проширувањето на ЕУ ќе биде според заслуги:
„Секоја земја ќе биде оценета според сопствените достигнувања. Поголема и побезбедна ЕУ значи посилен глас во светот.“
Потпретседателот на ДУИ, Бујар Османи, повтори дека не смеат да се отвораат нови прашања и вета, туку Македонија треба да се држи до договорите и правилата на ЕУ, кои, според него, ги штитат националните интереси.
