Европа потроши повеќе за енергетската отколку за пандемиската криза
Европа од минатата есен издвоила речиси 800 милијарди евра за санација на актуелната енергетска криза, објави вчера европскиот истражувачки институт „Бригел“ со седиште во Брисел, објави порталот „Еурактив“.
По одлуката за постепено намалување, а потоа и запирање на снабдувањето со руски енергенси, Брисел и членките на ЕУ колективно издвоија или веќе инвестираа 681 милијарда евра за заштита на домашниот пазар, економијата и домаќинствата од последиците. За истата намена заклучно со септември минатата година Велика Британија одвоила 103 милијарди евра, а Норвешка 8,1 милијарди долари. Податоците за енергетската криза во Европа за пазарот на Западен Балкан во оваа прилика не се објавени.
Во рамките на ЕУ, Германија плати најголем дел од пазарното порамнување во енергетската криза, издвојувајќи речиси 270 милијарди евра во различни форми на субвенции и стимулации. Велика Британија, Франција и Италија издвоиле по околу 150 милијарди евра.
Иако тековната зима во Европа беше главно блага, трошоците за санација на енергетската криза значително се зголемија од ноември 2022 година до сега, од 706 милијарди евра тогаш, на околу 792 милијарди сега.
Како што сега стојат работите, енергетската криза ја чинеше Европа повеќе отколку што имаше намера да потроши Брисел во борбата против пандемијата на корона во 2020 година. Имено, за борба со короната, ЕУ своевремено формираше паричен фонд „тежок“ 750 милијарди евра.
