ЕВН: Слупчане и Оризари остануваат без струја
ЕВН денеска известува дека селата Слупчане и Оризари во општина Липково се уште се без напојување со електрична енергија. По целовечерна работа на екипите на Електродистрибуција, струја добиле Ваксинце, Алешевце, Руница, Извор и Белановце.
Жителите на Слупчане вчера предизвикаа регионален дефект на неколку места со оштетување на опремата на ЕВН. Вчера жителите на Слупчане го блокираа патот во селото и не им дозволија на екипите на ЕВН да работат на мрежата.
Од компанијата велат дека се додека не се создадат нормални услови за работа и се загарантира сигурноста на вработените на Електродистрибуција, нема да работат на санација на дефекти или да извршуваат редовни работни активности во овие села.
–Во текот на ноќта беше предизвикан нов дефект, исто така од мештаните на Слупчане, кој ги остави без струја селата Матејче, Виштица и Никуштак. Овој дефект е саниран и снабдувањето е нормализирано и во овие села. Дефектот на граничниот премин Табановце беше саниран вчера за кратко време, велат од компанијата.
Од Слупчане бараат да им се простат долгови од по неколку илјади евра, да добијат бесплатни нови приклучоци, без разлика колку ќе потрошат во иднина да не им се фактурира повеќе од 3.000 денари, верските објекти да бидат ослободени од плаќање и слични други барања, кои додаваат од ЕВН, се спротивни на законските регулативи.
