ЕВЕ СО КАКВИ ГОЛЕМИ ЗАГУБИ НА ДРЖАВНИТЕ АД И ПРЕТПРИЈАТИЈА ЌЕ СЕ СООЧИ НОВАТА ВЛАСТ – како ЕСМ натрупа минус од 39 милиони евра за три месеци

Новата влада уште
не е формирана, но јасно е дека тоа ќе се случи наскоро. Ветувања за
подобрување на состојбите има многу, но интересно е да се види и со какви
проблеми ќе се соочи новата власт. А, дел од нив секако дека ќе бидат и
државните загубари, односно акционерските друштва и јавните претпријатија во
државна сопственост.

Министерството за
финансии квартално ги објавува податоците за тоа колкави загуби или добивки
имале државните претпријатија, а најновите бројки се за првиот квартал од
годинава.

Ако во таа ранг
листа на Фианнсии се опфатени 29 државни АД и ЈП, податоците говорат дека од
нив дури 13 во првите три месеци работеле со загуби, а 16 имале добивки.

Но, загубите на
загубарите се многу поголеми од добивките на другите.

А, од загубарите,
во убедливо најголем минус заглавиле државните електрани, или АД ЕСМ. Нивната
загуба за периодот од јануари до март годинава тежи дури 39 милиони евра, или
прецизно 38,87 милиони. Загубата се должи на многу повисоките расходи, наспроти
остварувањата на приходната страна.

Второто неславно
место по големина на загубите го делат Јавното претпријатие „Железници
инфраструктура“ и Јавното претпријатие „Национални шуми“, кои за три месеци
имаат „натокмено“ загуби од по 2,34 милиони евра, со тоа што Ѓелезници
инфраструктура е само во благо водство пред Национални шуми.

А, четвртото
место, секако дека е резервирано за уште еден државен „минусџија“, а тоа е ЈП
Железници Транспорт, чија загуба за првиот квартал од годинава достигнала 1,5
милиони евра.

Акционерското
друштво за контрола на летање М-НАВ, за првото тримесечје прикажало исто така
дебела загуба од 1,01 милиони евра, а зад него, на шесто место, за првиот
квартал од годинава се најде ЈП Стрежево, со „силен“ минус од 855 илјади евра.

Многу подобро не
е ниту ЈП „Водостопанство“, кое долг период мака мачи со загубите, и чиј минус
за првиот квартал е 841 илјади евра.

ЈП Злетовица има
загуба од над 567 илјади евра, а зад неа е, да не ја заборавиме, и славната „Македонска
пошта“, со минус од 457 илјади евра.

Во групата
загубари влезе и МЕПСО, преносниот оператор, иако нивната загуба е потолерантна
и за првите три месеци од годинава изнесува 137 илјади евра.

Од „добитниците“,
пак, најдобро е ЈП за државни патишта, чија добивка само за три месеци е 3,5
милиони евра, веројатно од наплата на патарини, но и преку нив оди
реализацијата на проектот на „Бехтел и Енка“.

Солидна добивка
направил и нивниот „брат“ – ЈП за одржување и заштита на магистрални и
регионални патишта, чија добивка изнесува 2 милиони евра за првиот квартал.

АД Номагас, кое
управува со гасоводот и е оператор за пренос на гас, за три месеци направиле
добивка од 1,46 милиони евра, која е солидна.

И вреди да се
спомене дека во плус, иако скромна добивка од 83 илјади евра, е ДООЕЛ Нафтовод, косопственик на македонско грчкиот нафтовод, кој неодамна доби лиценца за работа.

Останатите државни компании имаат помали загуби или добивки.

Н.Н.Ф.