Еве што е следно за членството на Финска во НАТО
Финска доби зелено светло за влез во НАТО, откако Турција синоќа ја ратификуваше кандидатурата на северната земја, објави Асошиетед прес. Со ова, Финска станува најновото дополнување на 30-члената западна воена алијанса.
За да биде примена нова земја, сите земји членки на НАТО мора да гласаат едногласно. Одлуката на турскиот парламент уследи по ратификувањето на членството на Финска од Унгарија, одобрено претходно оваа недела.
Финска има 1.340 километри заедничка граница со Русија, што значи дека границата меѓу НАТО и Русија сега е повеќе од двојно подолга.
Сепак, пред земјата да стане полноправна триесет и прва членка на НАТО, потребни се уште неколку чекори и процедури:
ПРИСТАПНИ ПРОТОКОЛИ
Турција и Унгарија испраќаат официјални протоколи до Соединетите Држави, кои се „чувар“ на Организацијата на Северноатлантскиот договор и каде што таквите документи се депонирани според договорот за основање на Алијансата во 1949 година. Протоколите ќе се чуваат во архивите на САД Стејт департментот, кој ќе го извести генералниот секретар на НАТО Јенс Столтенберг дека се исполнети условите за покана на Финска да стане членка.
ПОКАНА
НАТО испраќа писмо потпишано од Столтенберг во кое ја поканува Финска да се приклучи на воената алијанса.
ПОТПИСИ
Финска го испраќа својот документ за прифаќање, потпишан од министерот за надворешни работи Пека Хависто, до американскиот Стејт департмент. Финскиот претседател Саули Ниинисто го овласти Хависто да го потпише документот. Финската амбасада во Вашингтон или официјален фински владин претставник ќе го достави документот.
ЦЕЛОСНО ЧЛЕНСТВО
По пристигнувањето на документот за прием на Финска во Стејт департментот во Вашингтон, земјата официјално станува членка на НАТО.
ПРАШАЊЕТО ФИНСКА-ШВЕДСКА
Во мај 2022 година, Финска и нејзиниот сосед Шведска заеднички аплицираа за влез во НАТО. Земјите кои имаат блиски културни, економски и политички односи планираа истовремено да станат дел од воениот сојуз.
Но, кандидатурата на Шведска заглави поради противењето на Турција, чиј претседател рече дека неговата земја нема да го ратификува членството додека не се решат споровите меѓу Анкара и Стокхолм. Турската влада ја обвини Шведска дека не е доволно остра кон групите и заедниците кои Анкара ги смета за терористички организации.
Парламентот на Унгарија, исто така, допрва треба да го ратификува членството на Шведска во НАТО, но не е јасно кога тоа ќе го направи.
