ЕВЕ КАКО ДРЖАВАТА МИСЛИ НА ЕДНА СВОЈА КОМПАНИЈА КОЈА МНОГУ Ѝ ЗНАЧИ – што е „Проектот Бетовен“ во кој се вложуваат 2,5 милијарди евра
Холандската влада одвои 2,5 милијарди евра за подобрување на инфраструктурата, образованието и домувањето во регионот Ајндховен.
Оваа одлука не е од оние што се во „планот и програмата“ на државните институции. Одлуката е донесена поради една компанија.
ASML е со седиште во овој регион, а владиното финансирање е насочено кон поддршка на неговиот раст, но што е најважно, загриженоста од проширување надвор од Холандија.
ASML е еден од водечките производители на полупроводници, основан во 1984 година, со пазарна вредност од речиси 400 милијарди долари. Има над 40.000 вработени на 60 различни локации ширум светот, со повеќе од половина од нејзините вработени во Холандија.
Како ќе изгледа проектот на Бетовен?
Целиот проект наводно се вика „Проект Бетовен“, а се очекува да трае неколку години, пишуваат медиумите. Одлуката на владата да инвестира во регионот следи по навестувањата на ASML дека размислува да се прошири во странство поради холандската деловна клима, која вклучува регулативи за миграција на работна сила што ги ограничува странските таленти и проблемите со даночните олеснувања за иселениците.
Како одговор на можните планови на ASML да го премести своето седиште и да изгради дополнителен производствен капацитет во Франција, владата започна план за да обезбеди ASML да остане во Холандија и да го одржува своето седиште во земјата.
„При преземањето на овие мерки, Кабинетот претпоставува дека ASML ќе продолжи да инвестира и да го одржува своето законско, фискално и вистинско седиште во Холандија“, се вели во соопштението на холандската влада објавена од Ројтерс.
Доделените средства ќе бидат искористени за подобрување на транспортната мрежа, вклучувајќи патишта, автобуси и возови. Дополнително, инвестицијата ќе го поддржи техничкото образование и стручната обука за да се задоволат потребите на ASML за квалификувани работници. Проектите за домување се исто така дел од планот за да се приспособат на растот на регионот.
ASML ја поздрави владината најава и „Проектот Бетовен“, нагласувајќи ја важноста од поволните деловни услови, како што се достапноста на квалификувани таленти, инфраструктура и домување, за нејзините планови за проширување во Холандија. Компанијата соопшти дека со нетрпение очекува да работи со холандската влада за финализирање на одлучувањето во врска со проширувањето.
Бонитет.ком
Фото: ЕПА
