Енормна потрошувачка на вода во Скопје – можни прекини и намален притисок
Во текот на вчерашниот ден, системот за мониторинг и мерење на дневната потрошувачка на вода регистрирал повторно енормно зголемена и неконтролирана потрошувачка на вода во градот Скопје, информираат од ЈП Водовод и канализација – Скопје.
Според податоците, дневната потрошувачка достигнала околу 360.000 кубни метри вода, што сериозно го оптоварува градскиот водоводен систем. Како резултат на тоа, во неколку делови од градот веќе се бележат намален притисок и повремени прекини во снабдувањето со вода за пиење.
Од претпријатието потенцираат дека Скопје се снабдува со вода од природен извор со ограничен капацитет и непроценлива вредност, поради што е неопходна совесна и рационална употреба на водата. Граѓаните се замолуваат да избегнуваат непотребна потрошувачка, особено во летниот период, како што е полевање на зелени површини, бавчи и ниви, миење на возила, полнење базени и слично.
„Апелираме до сите граѓани, но и до органите на локалната самоуправа, преку нивните служби и месните заедници, да преземат активности за подигнување на јавната свест за рационално користење на питката вода,“ се наведува во соопштението.
Од ЈП Водовод и канализација посочуваат и на големите загуби на вода, кои достигнуваат до 65%, и кои главно се резултат на нелегални приклучоци и кражба на вода, а не на дефекти во мрежата.
„Апелираме до институциите со надлежности за санкционирање на ваквите појави конечно да почнат соодветно да постапуваат. Употребата на питка вода за наводнување на земјоделски површини или технички намени претставува сериозен проблем,“ стои во реакцијата.
