ЕКОНОМСКИТЕ ЕКСПЕРТИ ПРЕДУПРЕДУВААТ – КИНЕСКАТА КОНКУРЕНЦИЈА ЈА ГАЗИ ГЕРМАНСКАТА ИНДУСТРИЈА: „Ги надминуваат технолошките можности на Германија“
Германската индустрија ја губи трката од кинеската
конкуренција, а нејзина најголема пречка се високите трошоци за енергија,
предупредуваат економистите и индустриските експерти.
Германскиот извоз минатата година се намали, според
статистиката, за 1,7 проценти, на приближно 1,65 трилиони евра.
Вредноста на кинескиот извоз во странство се зголеми за 7,1
процент минатата година, на 25,4 трилиони јуани (3,04 трилиони евра).
Кинескиот напредок во
традиционално силните германски сектори
Кинеските компании водат жестоки ценовни војни на домашниот
пазар, а нивниот вишок капацитет претставува значителна закана за германската
индустрија, предупредуваат економистите и експертите.
„Кинеските конкуренти го намалуваат јазот и се сè поактивни
во сегментите на производи и во индустриските сектори каде што германската
индустрија традиционално била многу силна“, вели Филип Боинг, економист и
професор по емпириско истражување на иновациите на Гете Универзитетот Франкфурт
и ZEW Манхајм.
Во области како што се дигитализацијата и генеративната
вештачка интелигенција, кинеските компании „во некои случаи веќе ги надминаа
технолошките можности на германските конкуренти“, додаде Боинг.
Деценија пад на германската
индустрија
Германското индустриско производство е во опаѓање веќе десет
години, предупредува Јенс Бурхарт, експерт за индустријата и партнер во
меѓународната консултантска фирма BCG.
Според Бурхарт, секторите што трошат големи количини на
енергија, како што е производството на основни хемикалии, се во најголема
опасност.
Високите трошоци за енергија, исто така, го загрозуваат
автомобилскиот сектор и се главната причина за ослабената конкурентност на
германските компании, нагласува тој. „Германските
производители (на автомобили) ќе ја задржат својата моментална позиција ако
изградат позиција во сегментот на електрични погонски системи што може да се
совпадне со нивната традиционална позиција во сегментот на мотори со внатрешно
согорување“, рече тој.
Покрај хемискиот и автомобилскиот сектор, сè пожестоката
кинеска конкуренција им „дише во врат“ и на германските компании во сектори
како што се машинството и електроиндустријата, според BCG.
фото: EPA
