Ќе гладуваат ли 1.800 туристи на луксузен крузер откако македонскиот Џејми Оливер остана без пасош?
Млад скопјанец кој имал успешна кариера и стигнал до ниво да биде шеф на кујна на крузер кој угостува 1.800 туристи се соочува со страшни последици од правниот вакуум што го предизвика нашата држава со укинувањето на старите пасоши, а ненавременото издавање нови патни исправи. Сега Настески го изгуби договорот за работа на брод и се врати дома со патен лист кој важи само во еден правец, само до Македонија
Збрката со македонскит пасоши предизвика многу фрустрации кај граѓаните на кои државата не може да им испорача нови документи за патување. Но за жал, не се најголем проблем редиците за фотографирање или за подигање на изговените пасоши. Многу пострашно е тоа што има граѓаните кои престанокот на важност на пасошите ги фати на работа во странство. Невалидните документи за патување, иако не по нивна вина, ја загрозија нивната и егзистенцијата на нивните семејства.
Еден таков еклатантен пример е скопјанецот Виктор Настески кој работи на крузер и на компанијата П и О Крусес (P&O Cruises) и тоа на позиција извршен шеф што во суштина значи шеф на кујната на бродот кој сместува 1.800 туристи, а нив ги опслужуваат 820 членови на екипажот. Во превод тоа е функција на која Настески е одговорен за прехрана на сите гости и екипажот. Неговата мака е голема, а неправдата што му се случува е од епски размери.
Договорот за работа му е прекинат затоа што патниот лист е само за во еден правец. Настески пред менаџментот на бродската компанија не можел да даде прецизен одговор за колку време може да извади нов пасош и кога може да се врати на работа.
И според неговото пишување крузот со повеќе од 1.800 патници и над 800 членови на екипажот останува без одговорно лице за тој клучен сегмент од работата и не може да се најде замена преку ноќ.
Сите детали од описот на Настоски може да ги прочитате во неговиот пост на социјалната мрежа „Фејсбук“ https://www.facebook.com/chef.viktor.nasteski
Впечатокот во јавноста е дека партиите постојано и единствено што прават е да си префрлаат вината за тоа кој ја направил збрката и зошто на време граѓаните не добивале аларм дека последиците од оваа операција ќе бидат горливи, а за некои и егзистенцијални.
Актуелниот министер за внатрешни работи уште кога беше назначен најави дека гледа решение во проблемот само и единствено во продолжување на важноста на пасошите до крај на оваа година.
Но и покрај тоа втора седмица откако сме во правен вакуум затоа што овој предлог за законска измена уште не може да се најде пред пратениците иако илјадници македонски државјани во странство се затекнати со пасоши кои нашата држава веќе не ги признава и се откажа од нив иако рокот не им е истечен.
Р.Ф.
foto freepik.com/chandlervid85
