Држи ли кичма „Космодиск“? Како работеше најголемата компанија за интернет продажба во Македонија?

Ултра популарниот бренд „Космодиск“ пионер во продажбата на „Студио Модерна“ очигледно дека веќе не може да ја „држи цврсто исправена“ продажбата на најголемата македонска компанија за интернет продажба. „Студио Модерна“ лани заврши со загуба од 1,6 милиони евра и тоа е втора година по ред како таа голема компанија работи со загуба на нашиот пазар. Што се однесува до приходите тука работите стојат можеби и полошо. Тие лани се „стопиле“ за речиси 30 отсто во однос на 2021 година…

„Студио Модерна“ е најстарата, најголема и убедливо најпозната компанија за онлајн, интернет и телевизиска продажба во Македонија. На нашиот пазар работи подолго од две децении и нејзиниот успех и влијание се неминовни. Оваа фирма, основана во Словенија пред триесетина година е пионер на ТВ продажбата, а потоа и на он-лајн продажбата во Македонија.

За македонските купувачи на пиедестал повеќе од една декада се брендовите од програмите „Дормео“, „Делимано“, „Ровус“, „Валк Макс“ и други кои на нашиот пазар ги пробиваше „Студио Модерна“ преку историскиот „Топ Шоп“ и неговиот „претеча“ незаборавниот „Космодиск“ кој е на пазарот од далечната 1992 година.

Македонската компанија „Студио Модерна“ минатата година ја заврши со загуба од 1,57 милиони евра на приходи од 8,3 милиони евра. Компанијата во Македонија работи со загуба втора година по ред, а лани нејзината загуба е 3,5 пати поголема од загубата во 2021 година.

Навистина тежок период за најголемиот онлајн продавач во Македонија. Македонското „Студио Модерна“ е голема компанија на нашиот пазар која вработува повеќе од 200 лица.

Црните облаци над регионалниот мега-бренд „Студио Модерна“

Македонија не е исклучок од регионалната приказна на оваа голема и успешна компанија. Неодамна беше објавено дека словенечката компанија има проблем и доцни со исплатата на своите вработени. Нејзиниот соптвеник – словенечкиот милионер Санди Чешко потврдил дека словенечката фирма има проблеми со ликвидноста. 

Инаку Чешко е еден од најбогатите Словенци, а вредноста на неговиот имот е проценета на повеќе од 200 милиони евра. 

Повеќе детали има на овој линк https://faktor.mk/krah-na-osnovachot-na-dormeo—kako-najbogatiot-slovenec-so-imot-od-200-milioni-evra-dojde-bukvalno-na-rabot

Р.Ф.

Фото: Принтскрин Јутјуб