Државниот врв присуствува на седница на Анкетната комисија за трагедијата во дискотеката „Пулс“
Денеска во Собранието се одржува седница на Постојаната анкетна комисија за заштита на слободите и правата на граѓанинот, на која присуствуваат претседателката на државата, претседателот на Собранието и премиерот. Тема на расправата е претставка поднесена од родителите на младите лица кои загинаа во пожарот во кочанската дискотека „Пулс“.
Премиерот Христијан Мицкоски ја откажа закажаната посета на градежните работи на мултифункционалниот центар во Ново Лисиче и присуствува на седницата, по повиците од пратеничката група „Левица“, чиј претседател Димитар Апасиев раководи со комисијата.
Од „Левица“ порачаа дека присуството на пратениците од владејачкото мнозинство е клучно за одржување на седницата и извршување на надзорната функција на Собранието. Тие потсетуваат дека девет месеци по трагедијата институциите не презеле суштински мерки и нагласуваат дека државата должи минимум сериозност и политичка зрелост кон семејствата на загинатите.
Семејствата на жртвите инсистираат на целосно присуство на пратениците и на релевантните институции, предупредувајќи дека нема простор за пролонгирања.
Опозицијата, пак, изрази загриженост дека седницата може да пропадне поради можен недостаток на кворум.
Претседателот на Собранието предложи можност за одложување поради расправата за буџетот, но „Левица“ одлучи седницата да се одржи според првично закажаниот датум и време.
Паралелно, Собранието веќе формираше посебна анкетна комисија која ги разгледува поголемите трагедии во земјата, вклучително и пожарот во дискотеката „Пулс“.
